P’ Agerola saglienno d’ ‘a Custiera,
‘nfilata ‘int’ ‘a Balilla, dolce Amore,
te porto ‘na dummeneca a Furore.
Paesiello ‘e monte, appiso ‘ncopp’ ‘o mare,
llà ‘nce sta Bacco, ‘nu guappo trattore,
‘na loggia scicca, ch’ è ‘nu belvedere
e ‘o proprietario, n’ommo tutte core.
Affabile, aggarbato e cu’ manere
pronto a te fa’ accoglienza, accussì caro,
bussa cchiù all’amicizia ca a denaro,
ca si ‘o canusce pruove gran piacere!
‘Na tavulata sott’ ‘o pergulato,
‘na cumitiva ‘e curazzone allere,
brinneso alla salute, via ‘e penziere!
Cu’ ‘o vino cchiù preziuso e prelibato,
fritture ‘e pesce frisco, ‘e calamare,
‘nu piatto ‘e vermecielle ca par’ oro,
e pe’ tramente magne e guarde ‘o mare.
Ncopp’ a ‘na fisarmonica sfiatata
‘nu viecchio ancora arzillo e pazziariello
te sona ‘o sole mio, marenariello,
fenesta vascia e dove sta Zazà.
Po’ sazio e soddisfatto vide a Bacco,
cu’ ‘a cuppulella ‘ncapa e ‘a pippa ‘mmocca,
‘o pullovero, ‘e mmane dint’ ‘a sacca…
Don Rafe’, chistu cunto v’ ‘o pagh’ io,
‘o vvulite sape’: “Site ‘nu Dio!”
